El Primo de Beyrut

El Primo de Beyrut

Roz Kohen

Un diya ermozo en oktobre mi madre mi ermana i yo estavamoz en la kamareta chika de asentar, asiendo nada de emportante i enfasyandomos.

Ensupito oyimos la soneriya de la puerta kon una toka diferente. Ya konosiyamos las patadas i la manera ke kada uno de konosido sonava. El kapudji Memet sonava dos vezes i kon fuersa, la visina Matmuazel Bert yamava i sonava al mizmo tyempo, i mi padre uzava de chuflar antess la soneria una melodia kurta. Este chufle era suivido kon patadas prestas i livyanas.

Esta ves la manera de la soneria aparteniya sin safek a una persona etranjera. En efeto, kuando avrimos la puerta dupues ke mi madre aviya gritado "kim o?" — lo ke kere dizir "ken es" en turko — vimos en la entrada un ombre alto kon kara de riza. Ma mismo ke su fizyonomiya mos paresia konosida, no lo konosiemos de kara. Estava vistido muy elegante i teniya un ayre de evropeo. En esto, se adreso a mozotros en djudyo kon un aksante de fransez. Lo estuvimos mirando kon ezitasyon, el se aserko en sonriendo i mos ekspliko ke era el primo ermano de mi padre ke se avia engrandesido en Beyrut. Mi madre lo envito aryento i los dos empesaron una konversasion larga. El musafir era David Haleva, ijo de una tiya de mi padre. Se avian konosido kuando eran chikitikos, ma kada uno se avia engrandesido en un payis diferente.

El primo David Haleva biviya kon su famiya en Beyrut i teniya una butika de fausse bijouterie. Se aviya desidado de vinir a Estanbol para topar a su primos i a su tiya Devora ke era mi vava. 

Akeya tadrada kuando mi padre arivo fue una topadura formidavle entre los primos ermanos. La semana entera ke el estuvo en la sivdad de Estambol lo yevimos a David Haleva a vijitar a otros myembros de la famiya. Estas topaduras fueron muy alegres. Avlaron entre eyos i mos kontaron munchas memorias de chikes.

El primo de Beyrut teniya tambien un otro buto emportante. El mos konto ke sus ijos keriyan azer aliya a Israel. Portanto, djente ke bivian en Lebanon i en Israel no puedian korespondersen direktamente en akeyos anyos de 1957.

 El Konsolato israelyano de Estambol se okupava de los djudyos de Lebanon ke keriyan suvir a Israel. David Haleva i su famiya se estavan aparejando para este viyaje ke iva reunir a todos los Halevas en la Tierra Santa, kon el espero ke los mansevos ivan a arivar a la Medina en primero, i van a empesar de este modo una mueva vida kon esperansa i seguridad.

Poko duspues de esta vijita kurta de David Haleva, uno por uno en primero los mansevos pasaron de Beyrut a Estambol i kontinuaron a enstalarsen kon sus famiyas en Israel.

Duspues ke los ijos arivaron a Israel los de Haleva pudian koresponderse solamente via muestra famiya en Estambol. Kada letra de los paryentes a los ijos o de los ijos a los paryentes kadiya ser adresada a mozotros para ke metyeramos la letra en un otro envelop i mandarla a Israel o a Lebanon.

Portanto, David Haleva desho la buena vida en Lebanon i no ayego a suvir a la Medina. Sus ijos i su mujer fueron los alkavos myembros de la famiya en Lebanon ke arivaron a Israel.

Sus bizinyetos biven oy en Israel. Eyos son la kuatrena jenerasyon de la desendensia de las dos ermanas de Varna ke avian abandonado a sus kazas en la Bulgaria en el empesijo del ventyen syeklo.

Este viaje se alargo unos 60 anyos fista ke la majorita de esta famiya se arekojyo en Israel. Este anyo duspues de un medyo syeklo, tuve la alegriya de konoserlos a todos.