El Sigundo Enverano

El Sigundo Enverano de mi vida paso en la kaza de prinkipo alkilada de Mariola la grega.
En la photo, yo so el bebe travandose el fostan kon mi madre i mi ermana Dora Devora Kohen allado. Los vyejos son mi Papu Leon (Yeuda) Kohen de Silivri i mi Vava Devora Benshuan Kohen de Varna. La data eskrita kon la eskriturya de mi madre Ester Romano Kohen es "2 Juillet 1950". Yo teniya tredje mezes i apenas kaminando.

Los Novyos

La novya i el novyo en la fotografiya son mi madre Ester Romano i mi padre Izak Kohen ke kazaron an 30 May, mil novesyentos i trenta i mueve. La fotografiya hue tomada en Foto Sureyya en Estambol ke egzistyo en el tunel munchos anyos. Mi madre teniya vente i mueve anyos i mi padre trenta i trez. Eyos kontavan ke las vistimyentas ke vistyeron para la boda era emprestado. El padre de mi madre le aviya prometido mil liras al novyo komo dota ma komo el muryo un anyo antes de la boda, la dota hue dada a mi madre. Kreyo ke dar la dota direktamente a la ija era una tradisyon Romaniota. Los Romanos son Judios ke bivian en Estanbol del tyempo de los Bizantinos. Mi padre me tyene disho ke "mozotros no semos Sefaradim, semos Judyos". Me disho esto kuando le demandi en el anyo de 1985, la vez de alkavo ke lo vide, deke no avlava sovre el fakto ke aramos Sefaradim. Agora es byen klaro ke los Romaniotes de Konstantinople adaptaron a avlar Judeo-Espanyol en los dozyentos anyos de alkavo durante El Emperio Otomano.

Una Mirada de la Mizma Ventana

Roz Kohen
-----------------------------------------
En Bahçekapi, Estambol, en muestros diyas ay un otel grande, nombrado Legacy Ottoman Hotel. En mi alkavo vijita a Estambol, me hui a este otel i tomi una fotografiya de una de las kamaretas. En mirando de su ventana kon perdes de velur, se ve una kaleja ancha kon su mizma aktivita ke mi padre Izak Kohen, kuando lavoro komo sekretaryo del banker David Safra, estuvo observando durante sinkuenta anyos en este mizmo batimyento i en esta mizma kamareta.
EL batimyento historiko ke se yamava IV. Vakif Han, fue fraguado por el arkitekto Kemalettin ke bivyo entre 1869 i 1928. La fragua empeso en 1911 i se eskapo kinze anyos despues. En los anyos de la okupasyon de la sivdad, meldi ke los soldatos fransezez okuparon el batimyento fista ke la sivdad fue liberada.
Mi padre tambien empeso a lavorar aya en 1928 kuando era byen mansevo. El ofisio de bankerlik era de Musyu David Safra i mi padre serviya komo su ayudante. Musyu Safra era un banker ke dava devdas a los merkaderes djudyos de Kapali Çarsi, de Eminönü i Sirkeci. Esto era una forma de banka prive ke akomodava los merkaderes kon kapital para ke djiren sus komersio.
Kuando yo era ijika de 5-6 anyos, mi padre me trayiya al buro i yo me asentava en su meza i empesava a eskrivir en su daktilo vyejo. La kamareta teniya fotolyes de maroken i mobilya orijinal merkada en los anyos ke empesaron a lavorar. El batimyento entero era formado de kamaretas ke alkilavan para ofisyos.
Me plaziya mirar de la ventana en asperando ke mi padre eskape lo ke tenia de azer. La kaleja dainda es muy biva kon aktividades i pasajeros, entonses ke Bahçekapi es un sentro komersial muy importante. I djusto enfrente ay la patiseriya primera istorika de Haci Bekir ke fue fraguada en 1777, ande dainda venden Demirhindi el beveraje egzotiko etcho de tamarindi, dulsuruyas i shokolatas de stilo evropeo i lokumes de stilo otomano.
Duspues ke mi padre se retiro en el anyo 1978, el batimyento kontinuo a eskayer, ma ofisyos kontinuaron a okupar el batimyento fina ke antes unos kuantos anyos, desidaron de renovarlo komo otel.
Kuando likidaron la kamareta ande mi padre lavoro, la siya i la meza ke uzava las dyo a mi amiga Cavide. Es ansina ke kada vez ke vijito la kaza de mi amiga, me asento en la mizma siya i tomo fotografiya de la meza antika ke mi padre uzo por sikuenta anyos. Duspues me vo vijitar al otel, bevo demirhindi i me akodro de la vida de akeos tiempos. Penso ke la sola koza ke troko son las karas de los pasajeros. La Patiseriya de Haci Bekir, La Banka nombrada Istanbul Bankasi, el koftedji de Filibe i la Estasyon de treno en Sirkeci ke son unos kuantos pasos de leshor, ainda estan en sus lugar.
----------------------------------------------

Sinema Andjelo Muevo

Sinema Andjelo Muevo
Roz Kohen
--------------------------------------
Asentada sola en mi kaza, esto mirando filmos klasikos amerikanos de los anyos 1950, en uno de los sesenta chaneles de la televizyon. Kuando empeso el filmo Merry Widow kon Lana Turner, me se arebivyo una memoria de mi pasado.
Una notchada de diya de Shabat en Estambol, mos estamos aparejandomos a ir en Pera, al sinema muevo ke se avriyo akeya semana, el Yeni Melek (Andjelo Muevo). Akeos tyempos ir a Pera a ver un filmo amerikano, fransez, italyano o ir a una patiseria o a un teatro era un grande divertisimento para los djudyos.
Mos vistiyamos komo si fuera ke eramos envitados a la boda. Mi madre kitava en medyo los kalsados de sued kon la chanta asorti, el palto de pat d'astragan merkado en la butika de Madam Sofie enfrente de la Patiseria Lebon. Mi padre vistido kon kravata i el chapeyo feutr kaminando angaje kon mi madre, i mi ermana i yo penyadas kon kordelas i vistiendo kalsados de lustrin i guantes blankas kaminando mano kon mano. El anyo es 1954, i yo no me esto kreyendo ke malgrado ke tenia sinko anyos me akodri de todo komo si fuera oy.
La entrada del sinema muevo estava de kayer las bavas: una dekorasyon ke no teniyamos visto en los otros salones de sinema en Pera. Embasho lajas de marbolo, el tavan todo espejos i un dezinyo simple i moderno. Los otros sinemas dainda tenian dekorasyones klasikas, lodjas para famiyas, i siyas de kolor fonse. En el Yeni Melek, todas las siya eran korolados kon un balkon ancho. Los bilyetos tenian numeros i un lavorante amostrava el lugar ande mos ivamos asentar.
Me akodro de los kostumes del filmo, La Bivda Allegre, los bayles i la kantika famoza de la opereta austriaka ke mi mama i papa kontinuaron a kantar el refreno "Heure exquise, qui nous grise lentement! La caresse, la promesse du moment!"
El filmo se eskapo kon una fin alavada, i salimos borrachos del plazer.
Aviya munchos sinemas en esta kaleja famoza, i los nombres de los sinemas eran espesialos tambien. Melek/Andjelo, Luks/Lukso, Saray/Palasyo... Algunos dainda egzisten, ma el kustumbre de akeos tiempos de ir a ver filmos no egziste maz.
---------------------------------------

Las Kunyadas

Mi vava Devora Benshoam i su kunyada la Sueduasa Karin durante su vijita a Estanbol en los anyos de mil novesyentos i trenta. Su ermano Jean Nessim ke es el sujeto de roman "los eskarinyos de Shimonof" tyene vinido kon su mujer Karin a ver su ermana a Estanbol. Esto oy lo se grasyaz a las fotografias.

Mi vava de Varna

Esta photo la tengo grasyaz a los inyetos de la ermana Estreya de mi vava. En la syedra es la madre de mi vava, Doudou Benschoam.
Mi vava Devora Benschoam Kohen es la segunda en la parte deretcha de la photo kon vistimyenta fonse. La fotografiya kreyo ke es tomada en 1890 en Varna. Devora deve de tener unos disej anyos en esta foto.No tengo visto una photo de mi vava ande era tan manseva. Eya vino a Estambol en 1905 i kazo kon Leon (Yuda) Kohen de Silivri. Pasaron sus vidas en Tevfikiye Apartimani, allado de Benei Brit (Musevi Lisesi), la eskola Judia (ke es tambien renomada ke L'Alliance Francais) en Mektep sokak en la entrada de Dogruyol serka de la Kula. Mi vava mos desho la buena vida en el anyo 1956 en Estanbol.

El Mupak
Roz Kohen

Peni a akodrarme el mupak del apartamento ande me engrandesi, i tuve difikulta fina ke oyi avlas Sovre Enrico Caruso. La pensa de las plakas del kantador famoso ke muryo en 1921 me arebivio la memoria sovre el tresoro de mi padre ke lo preservava entre las lentejas i los garvanson en el boron vyejo adetras de la puerta en el mupak.

Este mupak muy muy chiko era bien brusko i eskayido komo el resto del apartamento. Las lajas de la pila eran tan eskayidan ke no era posivle de imajinar la kolor orijinal.
En kontrasto kon los mupakes de oy, kuando mi madre i padre estavan enjuntos rijendo gizados, no aviya lugar de entrar. Este mupak teniya doz ventanas entrechas kon vista del aydinlik de las eskaleras de tavla i kaji ke no aviya aver o luz natural. Komo estas ventanas no se pudian avrir nunka la palombas aviyan etcho nidos i mos kantavan el dia entero. Mi madre enshaguava los platos en un legen de aluminyon i mi padre entrava en el mupak para enshugar los platos kon una tovaja i para asender un orno vyejo ke teniamos en el mupak. En este orno se aziya las filas i un makaroni au gratin alavado ke solo el saviya azerlo.

No aviya lugar mizmo para mundar zerzevates en el mupak. Los aparejos para el gizar i kozer se aziya en la mezika chika en el koridor estrecho u en la kamareta de asentar.
El mupak era syempre yelado, i laz lajas de embasho eran un a kolor komo kolorado fonse. La pyedra de la pila era tan vyeja ke paresiya ke teniya burakitos i era bien dezgoznada. Aparte del legen de aluminium ke era uzado para meter los platoz en mojo, i el caydanlik para el flamur, aviya un almaryo de tel enkolgando en la pared i un boron viyejo adetras la puerta. El boron tambien era etco de una tavla pintada maron.

En este boron syempre ande estavan las plakas de musika de mi padre, aviya papeleras i kavanozez de lentejas, arroz, avas sekaz i garvansoz. Un mortero para majar muezez, un molino de mano para molinar kafe turko unas kuantas kucharas de tavla i el rayador de kezo allado de el molino de prasa ke mi madre uzava para aparejar koftes de prasa.

Las plakas ke mi padre aviya merkado kuando era mansevo era un sujeto sentral de mi padre i mos kontava ke eran sovre operas de Enrico Caruso. En particular "el Paylacho" le plaziya muncho. Las kantikas de Enrico Caruso no eran popularas en el medyo del siklo mas i mas ke el kantador aviya murido unos trenta anyos antes. Enrico Caruso no era solo en el boron vyejo de mupak, el era akompanyado kon Mario Lanza, el tenor Amerikano.

Un mupak vyejo,in ventanas kon su puerta vedreada , memorias de mi padre, de su kerensya de kantadores de al tyempo i mi madre molinando la prasa buyidaen el mupak estretcho, todo esto apuntandomos a un pasado de la vida judia de Estambol.