En los anyos 50 del siglo pasado, uzavamos a vijitar kon mi madre el entorno de la Kula. La Kula era lesho de sinko puntos de kamino del apartamento Melek, ande moravamos. Mi madre me tomava de la mano i mos metiamos en kamino kon grande entuziazmo.
Syempre era mas o menos lo mizmo: vijitar la prima de mi padre Jentil, ke morava unos kuantos apartamentos despues del kal Apollon; merkar karne kasher ande Dalva; ugradeyar ande la tant Sarina ke bivia enfrente del Bit Pazari; echar una boz al rez de chaussée de Dora Adato; i, devezes en kuando echar azete al kal.
En akeyos tyempos el kal de Neve Shalom dainda no era fraguado, i el kal d'Apollon, ke mi madre lo yamava el kal de los proves, era el kal lo mas frekuentado.
La Kula, en akeyos anyos era serrada, aparesiya muy eskayida i pasavamos al deredor de eya komo si no egzistiya. Me akodro tambien del kunduradji Musyu Navon, ke teniya una butikita chikitika i bruska, ande moz echava penches muevas a los kalsados vyejos por unos kuantos groshes. Una otra butika ke konosiyamos bueno en la Kula era la butika de Pardo, kon sus fostanes de novya ke alkilava. Unos kuantos elektrikchis ke adovavan lampas vyejas, i mas abasho unas doz butikas ke vendian livros i defteres para la eskola. Mas i mas me akodro de los eskirubadjis kon el sako en la espalda; los vendedores de frutas i de pishkados.
El deredor de la Kula en akeyos anyos teniya un ayre muy eskayida kon sus apartamentos vyejos, deskolorados i sus entradas kon golor de mofo i areskuras, kon unos kuantos borrachones kon las bochas de ispirto en sus mano, i los butikaryos baryendo las entradas i echando aguas a las kayes para espantar a los gatos ke eran numerozos.
La entrada del Kal Apollon no era diferente del resto de la kaleja. I mas i mas, komo al tinyozo un graniko mas, eran los sedakeros i sedakeras asentados en la puerta del kal.
Asentados en las eskalonas de laja en la entrada del kal de los proves, avlando syempre en Djudyo, eran yenos de bendisyones i alavasyones:
"Presyada, asi ke te veyga de todo bueno, ke veygas novya a tu ija, ke tengas el mazal en la puntal pino, todo bueno ke tengas i ke los dezeyos de tu alma ke se agan verda."
En mizmo tyempo saviyan todo lo ke se pasava en la male i eran komo los balabayes del kal, dando avizos i pruntando kestyones:
"El shamas ya vino, vas a echar azete al kal?"
Me akodro tambien ke kantavan en Djudyo kantikas alegres, en kontrasto kon sus vistidos eskayidos, sus karas flakas i sus bokas sin dyentes. Paresiyan orozos kon sus karas de riza.
Me akodro tambien ke los grandes mos espantavan kon avlas sovre zinganos, sedakeros i Sanpavlo. Moz dizian ke si no mos komportaramos bien, una zingana o un sedakero i mizmo Sanpavlo el mizmo, moz puedia arevatarmos. No saviya kualo Sanpavlo keria dizir, ma este byervo dicho kon boz alta ya me areventava la fiel.
Kon estos prospektos en mis penseryos, la entrada al kal de Apollon me dava un sentimyento de espanto mesklado de una kuryozita.
Las vijitas a los miembros de famiya ke moraron en el deredor de la Kula, el uzo de echar azete al kal, sus personajes estranyos kon los sedakeros en la puerta del Kal Apollon, no egzisten mas. Esto todo ke desparesio en muestro tiempo aze parte de mi pasado. Kada ves ke vijto a Estambol, en el fondo de una Kula i de su entorno, modernizado i restorado, sus rekuedros se arebiven i me parese oyir las bozes de los sedakeros de Apollon.
-------------------------------------------------
Ilustrasyon: Roz Kohen
No comments:
Post a Comment