En Noviembre 2007 kuando vijiti Estanbol kon mi ermana, mos desidimos a vijitar amigos entimos del pasado ke no los vimos por kuarenta anyos. Kaminando i avlando tomimos el kamino por la kula enderetcho a Barin Yurt ande munchos vyejos keridos de la kehila Judia de Estambol son mirados muy bien, grasyaz a los lavorantes i voluntaryos.
Pasando por Yazici sokak moz akodrimos del kirtasiyeci ke merkavamos kalemez i defteres kuando la eskola se avriya.
Kuando arivimos i entrimos en el batimyento, la amiga de mi madre mos konosyo pishin i moz gustimos de verla. Avlimos sovre los paseyos ke aziyamos endjuntos. Moz akodrimos de la boda i komo mi mama i papa le etcharon talled kuando kazo por la primera vez en 1960. Eya mos konto en riyendo ke kazo mas dos vezes. Mos gustimos de saver ke tuvo una vida larga i adventurosa i ke paso su vida entera en Estanbol serka de sus keridos. Esto enkontro hue la vez dalkavo.

Mi Biz Papu

Nesim Romano, el padre de Baruh Romano bivyo entre los anyos1838 i 1898. Esta photografiya es la mas vieja en la posesyon de mi famiya i es tomada en Konstantinople.

En Tierras Ajenas Yo Me vo Murir

http://www.gadnassi.com/
Unas de mis memorias hueron publikadas en la antolojia de Dr. Gad Nassi en 2000 en Estanbol i en 2005 en Barselona. Las mas muevas son publikadas en "El Amaneser" en Estanbol i en "Los Muestros" en Belcika.http://www.gadnassi.com/en_tierras/

Las Geuzlemes de Madam Sima

Las Geuzlemes de Madam Sima
Roz Kohen
-------------------------------------------------
Me akodoro dela eskola Bene Berit en Mektep Sokak en Estambol. Es ayi ke empesi la primera klasa kuando teniya 6 anyos. Mi padre estava tan gustozo ke me iva ir a la mizma eskola ke el hue. Mi vava morava a la fin de la kaleja e la eskola. Mozotros moravamos apenas a 10 puntos de leshura. La kaleja era siempre yena de pasajeros, de vendedores i del vizindado de djudyos i de turkos. La eskola era el sentro de la aktividad de la kaleja. Teniya paredes altas i una puerta pezgada de fyerro.
Musyu Izak el Kapudji, resivia en primero kada elevo. Avriya la puerta i mos tomava de la mano aryento. Mizmo ke teniya un sonrizo, era buen karar de seryozo. Todos saviyamos ke kon Musyu Izak no ay de dezmodrar. Lo ke Musyu Izak diziya ere Ley de Moshe. Ansi muestros paryentes savian ke ya estavamoz en manos buenas el punto ke metiamos pye en el kortijo de la eskola.
Musu Izak saviya todo lo ke se pasava en la eskola, I todo se demandava de el. Moshka no pudiya fuir de su ojo. Ma, el no era el solo en su tarea. Teniya una ayudante: Madam Sima, su mujer.
Los dos eran kargados kon el orden general en la eskola, fista ke entravamos en las klasas. Madam Sima se okupava de mizmo de aparejar la sala de komer i kayntar las komidas ke los elevos trayiyan en sefertasis.

Madam Sima era renomada por sus geuzlemes. Las geuzlemes eran unas fritadas de gomo de arina i muy savrozas. Munchos paryentes no keriyan ke los chikos merken kozas de los vendedores de las kayes. Portanto, las geuzlemes eran la sola koza ke mis paryentes me permetian de merkar.

Kuando la kampana ya dava a las dyez de la demanyana, todos los elevos saliyamos koryendo al kortijo para djugar, i en derecho al ofisyo chiko ke Musyu izak i Madam Sima tenian en la entrada allado de la puerta. Por unos kuantos groshes madam Sima mos vendiya sus geuzlemes grandes i fritas fresksas, ke mos dava aryento de un papel delgado, kon muncha asukar de polvo.
De esta spesyalita unika de Madam Sima, me akodoro fista oy.
------------------------------------------------------------------------------------------------------------