Mi Madre i la Estoria De Djoha

Mi Madre I La Estoria De Djoha

Roz Kohen

Estos son mis rekuedros sovre la estoria de Djoha ke mi madre, Ester Romano Kohen, me kontava kuando era chika. Tenia apenas 4-5 anios kuando biviamos serka de la Kula en Estambol. Kadal dia era la mezma konseja i me akodro de la lenteja ke me dava a komer kon kuchara en la boka. Me parese ke las madres i los padres djudios d'altiempo eran muy karinsiosos i ke eyos bivieron solo por sus kreaturas. Esta impresion me la desharon komo un regalo sakro. Portanto, no se ke karar la pude pasar la a mis ijas. Esta eskrita, la dediko a mi madre, ke nasio en Anvers en 1910 i murio en Londra en 1995. Su vida, la avia empesado en la Evropa i la eskapo en la Evropa. Ma, la bivyo en Estambol.

Aviya un rey muy malo i muy kaprisiozo. Un dia, se alevanto de la siedra i disho: "Yo kero saver kualo es la mijor komida del mundo. Ken meda la mijor repuesta le va dar de todo lo bueno, ma si la repuesta no me plaze lo va echarlo al zindan." Kada uno se estava espantando, sin saver kualo azer. Yamo a Zevulun, Zevulun disho: "La mijor komida es avaz sekas kon aroz." "Echa lo al zindan," grito el rey. Duspues vino Salamon: "La mijor komida es prasa kon koftes." "Al zindan," dyo orden el rey. Vino Menahem: "La mijor komida es el peshkado de gaya." "Al zindan," grito el rey. Otros respondieron: "Kalavasucho, borrekas, albondigas, guevos haminados…" i todos fueron mandados al zindan.

A la fin vino el torno de Djoha. El ya estava muerto del sar i antes de pareser delantre del rey, fue a ver a su padre prove ke era un kimurdji. Le demando: "Papa ke va azer? Si no supe la repuesta, el rey me va echar me al zindan." El padre de Djoha le disho: "Ijo, la mijor komida del mundo es el ambre. Si sos arto nada no te plaze, ma si tienes ambre, mismo el pan seko tiene savor."

Ansi, Djoha se fue al rey i le dio la repuesta. Al rey tanto le plazio esto ke los tomo a Djoha i a su padre al saray i les dio todas las rikezas fista la fin de sus vida.

Kada ves ke el rey demandava: "Yo kero saver kualo es la mijor komida del mundo," mi madre enkashava a mi boka la kuchara en dando la repuesta del dezmalado ke ivan a echar al zindan. Esta konseja se alargava o se akurtava asigun la kuantidad del komer ke avia kedada en mi plato, i ami me paresia ke nunka se va eskapar. 

Siempre vinia a la fin kon el pedaso dalkavo, la repuesta del Djoha… i me kontava despues la fin oroza en alimpiyando me los mushos.