La Butika de Musyu Navon

La butika de Musyu Navon 

Roz Kohen

-----------------------------

Kuando moravamos a sinko puntos de kamino de la Kula, viniyamos al deredor de la kula no solo para vijitar amigos i miembros de famiya. Unas de muestros vijitas era el kunduradji Musyu Navon.

Su butika era justo enfrente del Bit Pazari* famozo en la abashada de la kaleja muy serka de la kula i de los kales.

La butika de Musyu Navon era un budrum brusko kon una puerta de fyerro i sin ventanas. La butika goliya de mofo i por siguro de kalsadoz vyejos. 

Musyu Navon era un vyejo flako, bashikito i kayado ke aziya su echo kon dedikasyon en adovando kalsados viyejos.  Su ekipmyento era una meza de tavla hashabi, kon una makina de kuzir, unos kuantos kuchiyos para kortar koseles, unos kuantos klavos, martiyo i kerpeten. El teniya vistimyenta vyeja i una prostela mallograda de anyos de lavoro.

Musyu Navon era el artizano preferado de mi madre espesialmente, porke adovava por groshes i era el solo baratero entre los kunduradjiz de la male. Le trayiyamos los kalsados kon koseles komidas de arastar los pyes sovre las kalejas de la kula, i el surmetyiya una kosele godra sovre los burakos i metiya un pedasiko de fyerro en los karkanyales i las puntas de los kalsados. Esta kosele mueva kon el fyerro sobrebiviya anyos. El bruido de los koches i el fyerro moz aziya sintir muy byen ke anonsavamos muestros pasos en los koridores de laja de la eskola. La “taka tuka” de los kalsados era un sinyo de otoritad porke anonsava a todos ke los kalados son adovados i no burakados.

Entrar a la butika era tomar un risko porko la entrada estretcha i el eskalon charpeyado de pyedras grandes era un perikolo i kaliya yuzudear para no eskalavrarse en entrando.

Ma Musyu Navon por siguro estava aya oras lavorando en su butika yelada i bruska entre los kalsados de kada forma. Lavoro en el mizmo lugar en la mizma forma i kontinuo a ser el kunduradji preferado de mi madre fista ke  se desparesyo kon  todos los djudyos de la Kula.

---------------------------------

* En Turko Merkado de Pulgas