El Gazino Kazablanka

El gazino nombrado Kazablanka egzistyo en Tozkoparan fista los anyos de 1980 ma es en los anyos de sinquenta ke era un kazino de famiya i muchos Judyos bivian al dereder de Gazino.Teniya la vista de Korno de Oro i moz ivamos a bever un cay kuando saliamos a paseyar. Akeyos tyempos paseyar en kaminando se konsiderava un buen paso tyempo. Rankonravamos vizinos i amigos en kaminanda de Sishane a Tozkoparan, Tepebaşı i de aya a Asmali Mescit i a Pera. Oy en este distrikto ay El Museo de Pera un grande otopark i munchos restorantes i oteles. El otel famozo ke se yama Pera Palas hue fraguado en 1892 i es situado en el mismo distrikto i no troko muncho a la vista.
En la fotografiya, mi ermana i yo en el gazino Kazablanka en mil novesyentos i sinkuenta.

Un Paseo a Soguksu (Agua Yelada) en Estanbol

Me akodro de este paseo muy byen grasyas a las fotos ke mi padre tomo i ke me madre metyo datas. En el kavzo de esta photo la data ke mi madre metyo es el nueve Mayo, 1954. Las tres dammas son amigas entimas de me madre ke esta entre las doz. La ijika kon el buketo de flores serka de eyas es mi ermana, i yo so la chikitika mirandolas kon admirasyon. En el mez de Mayo la sivdad de stanbol es una maraviya. Akeyos tyempos era una okazyon de tomar un treno a la parte de Florya i vijitar este gazino, i pasear serka la mar. Mos ivamoz kon un grupo grande de amigos i komiyamoz doner en una lokanta en Kucukcekmece. Nunka no me olvide de estos paseoz. Las kuatro myembras de la fotografiya agora biven en mi korason i en mis memorias.

En la Entrada de la Jetee de Bostandji

Grasyaz a mi madre syempre se la datas de las fotografias. Esta fotografia hue echa "Le 9 Aout 1954".

Madam Rhea la visina grega teniya una barka chika i mos envitava en kada nada a darmos un torno kon la barka i a entrar en la mar en " El Kumru Yuvasi" en Bostandji. En la fotografiya estamos, de la syedra mi madre Ester Kohen, Rhea la visina, yo kon la kasket en medio, la ija de Madam Rhea ke se yamava Rita i mi ermana Dora. La barka ke teniya era byen chika i mos enkashavamos todos enjuntos i Rhea kon Rita ramavan. Mos plaziya entrar en la mar ande era unpoko mas ondo. Adetras se ve el debarkader de Bostandji ke dainda egziste ma La Jetee vyeja hue ramplasada. Komo las personajes en la fotografiya i los batimyentos agora son nada ke memorias. La djente mas ya no nadan aki mezmo ke dainda la vista es maraviyoza.

Los Tres Inyetos

Semos los tres inyetos de Devora Benschoam Kohen i Yehuda Kohen kon muestras madres Suzan Kohen i Ester Kohen. Va ser ke era un diya de Shabat o Alhad ande mi primiko, i mi tiyo kon su mujer mos vijitaron kuando estavamos en la kapanya en Bostanci, en el anyo de mil novesyentos i sinkuenta i uno. Akeyos trempos era moda de tener siyas de estrea para los chikos i Chezlonges (chaises longes) para los grandes en la guerta. Yo so la inyeta la mas chika i mi primiko bive en la medina.

En el Mismo Portal

La kasa ke alkilimos unos kuantos enveranos en Bostanci, la parte Asiatika de Estanbol en el anyo de 1955. La fotografiyas de kolor las tomi en el mes de Noviembre en 2007, duspues de sinkuenta i dos anyos. Oy la kasa es abandonada por su proprietaros porke no pueden arivar a un akordo i la repararla.

Entre la Kula i el Tunel de Estanbol

Esta fotografiya la aviya tomado en mil novesyentos i noventa i doz. Es la parte de Estanbol ande me engrandesi. El batimyento grande ke es en medio de la fotografiya se yama "Altinci Daire" i era para servisios de guvernimyento. Dr. Beraha morava en el apartamento alto a la deretcha, El Dr. Uzdil, Dr. Tabah i el Dantisto Dr. Jak Deleon a la Syedra. La entrada a la kaleja del los kales i de la Kula es al deretcho tan bien. Munchos batimyentos en este santro de Estanbol son echos al stilo de "NOUVEAU ART" i son konsiderados batimyentos historikos ke van a ser preservados.

El Sigundo Enverano

El Sigundo Enverano de mi vida paso en la kaza de prinkipo alkilada de Mariola la grega.
En la photo, yo so el bebe travandose el fostan kon mi madre i mi ermana Dora Devora Kohen allado. Los vyejos son mi Papu Leon (Yeuda) Kohen de Silivri i mi Vava Devora Benshuan Kohen de Varna. La data eskrita kon la eskriturya de mi madre Ester Romano Kohen es "2 Juillet 1950". Yo teniya tredje mezes i apenas kaminando.